के. आर. पब्लिक स्कूलच्या विद्यार्थ्यांचा 68 व्या राष्ट्रीय मल्लखांब स्पर्धेत सहभाग

नंदुरबार : येथील के. आर. पब्लिक स्कूल व ज्यु. कॉलेजच्या विद्यार्थिनींनी 68 व्या राष्ट्रीय शालेय मल्लखांब स्पर्धेत भाग घेतला. ही स्पर्धा मध्य प्रदेशच्या उज्जैन येथे आयोजित करण्यात आली होती. या स्पर्धेत देशभरातील जवळपास 500 विद्यार्थी सहभागी झाले होते. मल्लखांब पटूंचे स्वागत करण्यासाठी भव्य मार्च पास परेड आयोजित करण्यात आली होती. विशेष म्हणजे, सीबीएसई बोर्डाच्या विद्यार्थ्यांनी प्रथमच या राष्ट्रीय स्तरावरील स्पर्धेत भाग घेतला.

             स्पर्धेचे उद्घाटन जिल्हाधिकारी आणि क्रीडा अधिकाऱ्यांच्या उपस्थितीत झाले. विविध राज्यांमधून आलेल्या विद्यार्थ्यांनी त्यांच्या कौशल्याचे प्रदर्शन करत, उत्कृष्ट कामगिरी केली. के. आर. पब्लिक स्कूलचे विद्यार्थी कु. समिक्षा बैसाणे, कु. प्रेक्षा पाटील आणि कुमार मित चौधरी यांनी शालेय स्तरावर उत्तम कामगिरी करत राष्ट्रीय स्तरावर स्थान मिळवले. या विद्यार्थ्यांनी संयम, कठोर मेहनत, आणि कौशल्याच्या जोरावर शाळेचे नाव उज्ज्वल केले.

        विद्यार्थ्यांना यासाठी शाळेचे अनुभवी प्रशिक्षक योगेश बेदरकर यांचे मार्गदर्शन लाभले. त्यांच्या मेहनतीमुळेच हे विद्यार्थी राष्ट्रीय स्तरावर पोहोचू शकले. या विद्यार्थ्यांच्या यशावर शाळेचे चेअरमन किशोर वाणी, व्हाइस चेअरमन सिद्धार्थ वाणी, आणि प्राचार्या डॉ. छाया शर्मा यांनी कौतुकाचा वर्षाव केला. त्यांनी विद्यार्थ्यांना भविष्यातील स्पर्धांसाठी प्रोत्साहन दिले व यशस्वी वाटचालीसाठी शुभेच्छा दिल्या. 

             या राष्ट्रीय स्पर्धेतील सहभागामुळे नंदुरबार जिल्ह्याचे नाव राष्ट्रीय पातळीवर झळकले आहे. अशा स्पर्धांमुळे विद्यार्थ्यांच्या सर्वांगीण विकासाला चालना मिळते. त्यामुळे भविष्यातही अधिक विद्यार्थी अशा स्तरावर आपली प्रतिभा सिद्ध करतील, अशी अपेक्षा व्यक्त करण्यात आली. या विद्यार्थ्यांनी उत्कृष्ट कौशल्य दाखवत राष्ट्रीय स्तरावर आपली ओळख निर्माण केली असून, यामुळे के. आर. पब्लिक स्कूलचा शैक्षणिक तसेच सांस्कृतिक स्तर उंचावला आहे.